KUTHA WONOSOBO

Dening : Eko Hastuti

 Kutha kang jembar bawera

Ngilak- ilak  sapendelenging mata

Cumondhok ing tengahing arga

Ereng-erenge Sumbing, Prau, Sindoro, Bismo lan Telomoyo

Papane dhuwur ngawiyat

Antara 270 tekan 2.250 meter  saka lumahing samodra

Hawane adhem gawe tentrem

Tumraping warga kang wus padha katrem

Kaisik-isik sumribiting maruta

Tumiyub sribat-sribit, silir-silir

Leledhang nglelipur nala

Kang  cuwa, sungkawa, lan nelangsa

Dadi mulya

Tetanduran kang ijo royo-royo

Ing sawah, tegal lan pereng-pereng gunung

Sedhep sinawang netra

Rumesep pating trecep ing telenging ati

Dadi tandha kamurahaning Gusti kang welas asih

Nyipta bumi pertiwi kanthi sampurna

Mrih para jalma manungsa suka parisuka

Amemangun raharjaning praja

Tuk, belik, sendhang lan tlaga

Banyune kimplah-kimplah kaya segara

Dadi punjering plancongan padha teka

Ngendhangi  Dhieng, Tlaga Pangilon, Tlaga Warna

Kawah Sikidang, Guwa Semar lan Tuk Bimolukar

Kang sumebar ing saindhenging Kutha

Kang sakawit gung liwang-liwung

Kabubak kawah dening  Kyai Kolodele, Kyai Karim lan Kyai Walik

Duk abad kaping 17 kawiwitane ngumbara

Ing Dieng, Kalibeber, lan papan kang saiki dadi punjering kutha

Kang sabanjure katetepake dadya

Tanggal mijiling kutha, bebukaning crita

Tiba ana wulan Juli tanggal patlikur tahun 1825

Saben 24 Juli kapengeti dadi dina dumadine kutha

Wus kawuningani dening sagung warga

Kabeh samya mangayubya kanthi gumbira

Wonosobo, 5 Februari 2012